Sa bawat araw na ginawa ng Diyos
Nabubuwisit ka sa
Trapik na sasalubong sa’yo.
Sa mga balitang puro
buladas ng mga pulitiko.
Sa mabagal na internet
at bakit antagal ng inorder
mong espresso.
Samantala sa ibang dako ng mundo
59 ka tao ang namamatay,
16,774 ang lumilikas sa kanilang tahanan
306 ang sugatan at 190 nito ay kabataan
323 ang nawawasak na mga kabahayan
sa patuloy at walang habas na
pag-atake ng Israel
sa Gaza
sa bawat araw na ginawa ng Diyos.
———–
08.09.2014
Matina DC
Kahit sa Panalangin
(Matapos pakinggan ang kanta ni Yusuf Islam/Cat Stevens na The Little Ones)
Sa pagtulog mo ngayong gabi.
kahit sa panalangin
ipagdasal mo ang mga inosenteng
musmos sa Gaza,
sa madilim na gabi
nanginginig sa takot,
impit ang hikbi.
Nawa’y hindi sila masaktan
nawa’y manatili silang ligtas
nawa’y hawak ng maliliit nilang
kamay ang kanilang
mga laruan.
Ipikit ang iyong mata,
abutin mo sila,
at yakapin o itago sa ilalim
ng iyong kama kung yun
lang ang maari
mong gawin
kahit sa panalangin.
kahit man lang sa panalangin.
Davao City
25.07.14
Para rin tayong OFW
Nagtatrabaho malayo sa pamilya
sa lugar na balot ng pangamba.
Nagsusumikap sa bawat araw.
Naninirahan sa inuupahang bahay.
Nagluluto ng sariling ulam.
Oo, para nga tayong OFW
Kumakayod para may maipadala sa pamilya.
Cotabato City 4.27.2014
Batiin ang Sabado ng umaga
ng malamyang pagbangon.
Kaaya-ayang bagal,
sagadsad ang hakbang ng oras
sa malamyos na galaw ng araw.
Davao City 2.1.2014
Sa panahon ngayon mali nang gamitin sa romantikong pagsasalarawan ang ulan. Hindi ka na magtatampisaw sa saya o mapapasayaw sa ulan, kundi mababaliw ka na sa baha at dulot nitong pinsala, isama mo na pati mga labahang nananatiling basa.
Davao City 1.14.2014
Tinatapos ang weekend sa pamamagitan ng pagpunta sa mall para manuod ng sine, at pagkatapos ay kakain sa Chowking. Konting ikot para busugin ang mga mata at magpantasya sa mga nakadisplay na magagarang paninda, mayapa’y tataya din ng lotto. Pasyal ng mga ordinaryong mortal, salat man sa karangyaan pero walang kapantay ang kasiyahan lalot na’t mahal sa buhay ang kasama. Gabi na, uuwi na para sa kailangang pahinga dahil bukas, banat buto uli.
Davao City 1.12.2014
Ang hirap magbilang ng mga araw na walang kasiguruhan.
Ang magtiis sa mga puwang ng kawalan ng ngayon at bukas.
Kapag delayed ang sahod at paubos na ang bigas.
– Cotabato City, August 8, 2013